Languages

Thi thekin chujni

Kuentue kulucho ko kukuchi

Fuente: http://1.bp.blogspot.com/-_KIGkMdXrrE/To-Ec36OdnI/AAAAAAAAB34/pzV1FviSlZ4/s1600/EL+ASNO+Y+EL+CERDITO+-+F%25C3%2581BULAS+DE+ESOPO.jpg
Beꞌe naa nchaꞌon kulucho chjeꞌa na̱ ba ka
juine ba. Ko anto beꞌen ba jintha. Ko
taxindangeꞌe ba ko kjui ba ngandangii koree
kukuchi ixin juine ba ka dixexin dine kukuchi.
Are ndachro kukuchi:
―¿Unda jaꞌa anto ncheꞌe xra ko chjaꞌa na
jinthe jian ko jaꞌan ná xruꞌin xra nthaꞌa ná ko
anto jian jine ná ko tsinda ná nanao?
Kuthejan ndachro kulucho:
―Jaan, ndua anto nthaꞌa xra ko te nchaꞌon ni
jinda diꞌa, aro icha see sarichon jaꞌan ke jaꞌa ra.

Kuthejan banchiangi kukuchi:
―¿Unda seꞌa sarichon ná jaꞌan ná?
¿Kexreen nuaxin jaꞌa? ―ndachro kukuchi.
Ko nichja kulucho inaa ko ndachro ba:
―Jaan, jaꞌan nuna ixin jai juikian ná karaꞌo
ruxruthexin ra jaꞌa ra, ixin ndue ndasuen ra na̱
jaꞌa, xinthaxijno ko kuthuchjon ixin ndue
tsutheꞌe naa xeꞌen na̱.
Jañaa kuiꞌin kukuchi ko anto xraon ba.
Kuthejan kukuchi ndache ba kunthaxijno ko
kuthuchjon:
―¿Kexreen sinthoꞌo ná jai ixin ndue ndasuen
na ná ixin ndue tsutheꞌe naa xeꞌen na̱, jañaa chro xilucho, ixin jeꞌe xa kuame xa karaꞌo juiaꞌo na̱
ixin ruxruthexin ná jaꞌan ná ndue.
Kuthejan ndachro kuthuchjon kunixin
kunthaxijno:
―Icha jian jai tsukjin satsinga ná.
Kuthejan ndachro kukuchi:
―Aro jaꞌan anto nthaona ko chruꞌa santhjaa
korana.
Ndachro kuthuchjon:
―Jaꞌan ná santhjaa ná kora ko jaka satsji ná.
―Jaan, remee –chro kukuchi.
Ko ndua nchion kunaxin xeꞌe are ujuii na̱
juitsjeꞌe na̱ ba ko ndachro na̱:
―Ndue suen ná kukuchi, kuthuchjon ko
kunthaxijno.

Ko jeꞌe ba kuiꞌin ba mee ko icha xraon ba.
Ko are inchin ngusine thie bachrje
kuthuchjon ko ndache ba kunthaxijno:
―Anchee danthjee na̱ koree xikuchi ixin
satsjiꞌo ná xa.
―Jaan ―chro kunthaxijno.
Ndua banthjee ba koree kukuchi. Ko bachrje
kukuchi ko ndua sajuikao choo ba. Ko are
bingasaan juitsjeꞌe ni suen ba ko ibeꞌa ni naa ba.
Kuthejan jeꞌe thi ruguen ba ndachro ngain ni
icha:
―¿Aro keꞌe kuxiigo suꞌen?, ixin xruꞌin
kuxiigo bikon jaꞌan.
Ko tuin juitsjeꞌe ni icha, ko nduaxin, ibeꞌa ni
naa ba. Kuthejan ruee na̱ thi dingachje ruthee
ba.
Aro jeꞌe ba sadikji ba ngagaꞌa jna ko ibitjaꞌa
na̱ ba. Kuthejan sakjan na̱ nduꞌa na̱ ko ixruꞌin
kiai bechunda na̱.

Ko jeꞌe ba nthiꞌá ngaꞌa jna anto baxraon ba
ixin bakuyao kundanixra, mexinxin kjuao choo
ba. Ko ndachro kuthuchjon ngain kunthaxijno:
―Jaꞌa ngagaꞌa nthaa nui darichrin ko are
sikon tsii kundanixra tuyauthe ni ra suji.
―Jaan ―chro kunthaxijno.
Ndua, are bakii kundanixra bandachro
kunthaxijno:
―Gordo, gordo, gordo, gordo.
Ko kuthuchjon batjon ba ko bagintja ba
nunthe ixin raa ba. Ko kukuchi bakujieꞌe ba suji.
Jañaa bakiꞌin kundanixra ko baxraon ba ko
ibakunchien'a ba.
Jañaxon ko jañaxon bancheꞌe ba bithjaja yoo
kunithjao. Kuthejan ndache choo ba:
―Anchee, jina isuenꞌa ná na̱, icha jian
sachjin ná ngain na̱ inaa.
Ndua batho yoo kunithjao, kuthimejan kjan
ba nduꞌa ba ngain naa thie. Ko are bingasaan unthiꞌa tate ba. Kuthejan bikon ni kuxigue ko
anto chee na̱. Ko ndachro na̱:
―Dikjan kuxigua ná inaa. Anchee,
irundachruꞌa ná ixin suen ná ba. Icha jian tate
ba.
Ndua bakeꞌe na̱ ba juine ba jian ko tabinte ba
nchia.
Yaa juexinxin kuentue kukuchi ko kulucho.